logo

                            ​        

Partenaris

Tous

14/01/2014

L'OSTAL D'OCCITANIA DE TOLOSA DOBRÍS SAS PÒRTAS

Amb la creacion de l'Ostal d'Occitània, la comuna de Tolosa dòta la vila d'una institucion en ligam amb son estatut istoric e cultural de capitala d'Occitània.

L'Ostal d'Occitània que la gestion es confiada per la comuna a la federacion Convergéncia Occitana, que recampa un quarantenat d'associacions dedicadas a Occitània, serà l' ostal de las associacions de Convergéncia Occitana e del Conservatòri occitan ; un luòc e un esplech de creativitat e de raionament al servici d'una cultura occitana viventa, a travèrs la lenga, la musica, lo teatre, l'istòria, l'arqueologia, la filosofia, los escambis interculturals.

Lo projècte d'Ostal d'Occitània, arrestat per Dominique Baudis en 1999, es estat realizat per la comuna de Tolosa per un budgèt de 3,08 milions d'€ HT a aqueste jorn, amb lo sosten del Conselh General de Garona Nauta e del Conselh Regional Miègjorn-Pirenèus.

L'Ostal d'Occitània serà installat sus dos sitis distinctes : lo siti Malcosinat, inaugurat per Jean-Luc Moudenc, Cònsol màger de Tolosa, lo 16 de decembre de 2006, e lo siti de la Dalbada (carrièra del Pont de Tonís, fàcia a la glèisa de la Dalbada), que serà acabat a l'estiu de 2007.

La creacion de l'Ostal d'Occitània s'inscriu dins la demarcha volontarista de la comuna que, jos l'impulsion renovelada de Jean-Luc Moudenc e René Bouscatel, adjont al Cònsol e president del grop dels conselhièrs municipals per la cultura occitana, desenvolopa un programa ambiciós en direccion de la cultura occitana.

La Comuna participa a la conservacion, a la creacion e al desenvolopament de la cultura e de la lenga occitanas a travèrs son ajuda a las associacions, per un montant annal total de 250 000€, e lo desenvolopament de divèrsas accions coma lo balisatge istoric de la vila en occitan, la denominacion bilingüa de las carrièras o encara lo renforçament dels ligams entre la municipalitat e las associacions

Genèsi de l'Ostal d'Occitània

  • 3 de mai de 1999 : decision de crear l'Ostal d'Occitània presa per Dominique Baudis, en acòrdi amb l'associacion Convergéncia Occitana creada lo 26 de decembre de 1998.
  • 22 de junh de 2000 : aprobacion del projècte pel Conselh General de Garona Nauta.
  • 2001 : compra de l'imòble de la carrièra Malcosinat per la Comuna de Tolosa
  • 2004 : començament dels estudis, expertisas e òbras al 11, carrièra Malcosinat.
  • 16 de decembre de 2005 : decision de subvencion del Conselh Regional Miègjorn-Pirenèus.
Cinéma / Vidéo
14/01/2014

L'Ostal Occitània

L'associacion "Convergéncia Occitana" foguèt creada en decembre de 1998 a l'iniciativa de las 40 associacions "fondairises" e signatàrias de la carta de Convergéncia occitana.

Lo seu objècte es de "determinar e balhar vam a un politica occitana vertadièra per Tolosa e dempuèi Tolosa, per Occitània".

Convergéncia Occitana que lo seu sèti es d'ara enlà a l'Ostal d'Occitània, 11 carrièra Malcosinat a Tolosa, es una federacion compausada en 2008 de prèp de 60 associacions que trabalhan per l'occitan e la cultura occitana.


Es dirigida per un ofici, presidit dempuèi 2001 pel Sénher Joan Francés Laffont.

Las associacions sòcias soscrivon a la " Carta de la Convergéncia Occitana ", dins una meteissa concepcion de l'identitat occitana e dels objectius comuns :

Una meteissa concepcion de "l'identitat occitana" :
L'identitat occitana es una identitat reconeguda, causida e compartida.
Se caracteriza per la pluralitat. Tròba los seus fondaments dins la seuna civilizacion milenària, la seuna lenga e la seuna literatura que n'es la seuna esséncia. Luènh d'una concepcion calhada de la cultura, es sorga de modernitat que daissa cors liure a una creativitat totjorn renovelada.

D'objectius comuns :
Tolosa tornarà trobar lo seu ròtle de capitala, parlarà d'egal a egal amb totas las capitalas del mond talas coma Berlin, Milan, Nòva Yòrk, Barcelona, Salvador de Bahia... en desenvolopar los seus escambis amb totas las culturas. Tolosa deu notadament desenvolopar los seus ligams pivilegiats e milenaris amb los Païses Catalans.

Per aquò far, Convergéncia Occitana :

  • fòrta de la sinergia creada per la mesa en comun dels mejans existissents, s'emplega a tirar de ressorgas novèlas per la politica culturala que Tolosa s'amerita.
  • participa a una difusion larga e dobèrta a totes de la lenga e de la cultura occitana.
  • es un luòc de rencontre, de coneissença, d'escambis e faculta las aliganças mentre los seus sòcis que son eles-meteisses responsables de la lor accion del lor sicap.
14/01/2014

La lenga e la cultura occitanas, Al còr de l'identitat de la Region Miègjorn-Pirenèus

La lenga e la cultura occitanas constituisson un patrimòni natural, istoric e cultural comun, qu'es un element fondator de la personalitat de Miègjorn-Pirenèus. Es naturalament e legitimament al còr de las preocupacions de la Region.

Lo Conselh regional s'es fortament engatjat dins la realizacion de l'Ostal d'Occitània a Tolosa qu'acuelha notadament las associacions federadas al sen de Convergéncia Occitana. A investit 732 300 €, siá mai de 15 % del total de la realizacion, en mai de l'ajuda financièra a las estructuras que recampa.

Aquesta intervencion s'intègra dins un dispositiu mai larg, desenvolopat jos l'impulsion de Martin MALVY, de sosten a la lenga e a la cultura occitanas. Dempuèi 1998, lo budget regional consacrat a la cultura occitana a augmentat de 50 %, per aténher uèi un milion d'èuros, fòra investiments. Los esfòrces se son notadament portats sus la valorizacion e la transmission de la riquesa patrimoniala occitana, mai particularament en direccion dels joves, e sul sosten de las accions innovantas dins lo domèni de la pedagogia e de la creacion artistica.

La Region sosten atal los projèctes que contribuisson a una melhora coneissença de l'environament (toponimia, luòc de memória), a la promocion du bilingüisme, a la formacion, al desenvolopament de la creacion, al renforçament dels ligams interregionals sud europèus e mediterranèus, compte tengut de la situacion de Miègjorn-Pirenèus dins los Païses d'Òc e del ròtle essencial que jogan la lenga e la cultura occitanas en Euròpa del Sud e dins lo mond mediterranèu.

Acòrda una atencion particulara al renforçament dels pòls federators e estructurants de vocacion interregionala : Cordae-La Talvera, lo Conservatòri Occitan, l'Institut d'Estudis Occitans, la Federacion Regionala de las Calandretas, lo Teatre Interregional Occitan, Ràdio Occitània e Ràdio País, lo Centre Regional dels Ensenhaires d'Occitan, Oc-bi Miègjorn-Pirenèus. Participa tanben al finançament del Centre de Ressorças Occitanas e Meridionalas e a un plan de valorizacion de l'occitan dins los licèus.

En matièra d'ensenhament de l'occitan, lo Conselh regional mèna actualament una reflexion, dins lo quadre de la lei novèla d'orientacion sus l'escòla, sus la preparacion del convencionament sus l'ensenhament de e en occitan que permetirà, d'un biais segur, un desenvolopament quantitatiu e qualitatiu de l'ensenhament dins los establiments escolars de la region.

Servici de premsa : Sandrine LOCCI

tel : 05 61 33 56 31 - 06 16-33-77-66
fax : 05 61 33 50 16
corrièl: midipy.press@cr-mip.fr