logo

                            ​        

Las associacions

CREO 31

Per l'ensenhament de l'occitan en occitan, de la mairala a l'universitat

 

Lo CREO 31 es una associacion d'ensenhaires de l'Educacion nacionala, de la mairala a l'universitat, que trabalha a la transmission de la lenga e de la cultura occitanas en mitan escolar; es dubèrt a tota persona qu'òbra a aquel objectiu, que siá ensenhaire o pas.

Per sas accions pròprias o en  coordinacion amb d'autras associacions de Nauta Garona, lo CREO 31 far de proposicions als poders publics per far viure la lenga e la cultura occitanas dins la societat.

L'ensenhament de l'occitan s'adreça a totes: permet de desvolopar  las aptituds intellectualas, lingüisticas e culturalas, lo mestritge del lengatge en general e del francés en particular, las aptituds a l’aprendissatge de las lengas, tot en aprestant los escolans a viure d’identitats de mai d’un nivèl, pluralas e complementàrias, dins lo pais ont son o endacòm mai.

Per tant, lo CREO 31 vòl melhorar las condicions d'ensenhament, tant pels escolans coma pels ensenhaires, e desvolopar aquel ensenhament a totes los nivèls segon dos axes:

  • l'iniciacion-sensibilizacion per totes
  • l'ensenhament bilingue francés-occitan

Lo CREO 31 es la seccion de Nauta-Garona del CREO de Miègjorn Pirenèus que participa al Conselh Academic per l'Ensenhament de l'Occitan presidit pel rector de l'acadèmia de Tolosa.

I demandam que l'ofèrta d'ensenhament siá progressivament generalizada amb de mejans e de tèxtes oficials per aquò far.

En Nauta-Garona, lo CREO 31 es tanben portaire del projècte « Animòc » en partenariat amb lo Conselh Regional, lo Conselh General, las comunas e l'Inspeccion Academica . S'agís d'animacions regularas dins las escòlas per ajudar los mèstres a prene en compte la lenga e la culturas occitanas amb sos escolans.

D'autres projèctes son a l'estudi, notadament de plaquetas pedagogicas per integrar l'occitan dins la descobèrta de lòcs remirables del departament ( passejadas istoricas, Tolosa, bastidas, paisatges, ...)

Lo CREO es tanben un lòc de conselh, d'ajuda e d'escambis pels ensenhaires.

Contactes:
CREO31
Ostal d'Occitània
11, carrièra Malcosinat
31 000 Tolosa

creo31@free.fr 
05 62 71 12 52

Autras entre-senhas:
http://www.creo-mp.org

Ont apréner l'occitan ?
http://creo-mp.totenoc.org/ont_aprener.html

Per aderir al CREO31 :
http://creo-mp.totenoc.org/Butletin_per_aderir_al_Creo_31.pdf