logo

                            ​        

Las associacions

JOVENTUT MONDINA

 

 

 

 

 

 

 

Los objectius

Segon l'article 4 dels estatuts de la Joventut Mondina, las missions prioritàrias de la nòstra federacion son :
  • la representacion e la defensa dels interèsses de la comunautat dels joves tolzans en çò dels partenaris institucionals (universitats, rectorats, collectivitats territorialas...) mas tanben la creacion d'un ligam amb los partenaris privats (entrepresas, monde politico-associatiu, mitan de la cultura).
  • la creacion e la gestion d'una ret susceptible d'ofrir als membres de la federacion los servicis necessaris a la valorisacion de lor patrimòni cultural, tanplan coma divèrsas oportunitats de metre en practica e de perfeccionar lors acquesits lingüistics.

Prepausam de completar e de desvolopar los objectius de la federacion per una ventilacion en tres dimensions : culturala, sociala, e politica.

 

1) Dimension culturala :

Es benlèu la dimension mai evidenta per çò que pertòca d'en primièr la lenga e la cultura occitanas. S'agís per exemple d'aver une aisina de socializacion de la lenga e de contunhitat dins sa practica. D'aver un otís aisit que facilite la descubèrta de la cultura pels que serián interessats, o encara de favorizar tota accion que concernís lo manten e la promocion de las tradicions e de lenga pels joves d'ont que siaguen.

 

2) Dimension sociala :

Es de per la natura d'una federacion una composanta essenciala, e que recampa las autras dimensions. S'agís per exemple d'organizar de rescontras entre joves « occitans » de la vila de Tolosa, atanplan coma amb d'autres joves eissits de las autras comunautats culturalas de la vila. Crear ansin una cèrta coësion e donar un imatge dinamic e valorizant, o encara coordonar las òbras de las diferentas associacions de joves qu'an per amira la promocion de la cultura occitana e de sa lenga ; ganhar ansin en productivitat, en eficacitat e pes.

 

3) Dimension politica :

La federacion es una aisina de participacion a la vida de la Ciutat. S'agís per exemple d'èsser un espaci privilegiat dels joves en çò del ret occitan de Tolosa, ont vòl portar d'una votz unica e organizada lor paraula. D'ajudar los joves a trobar d'estagis o de trabalh lor permetant de metre en valor lors competéncias lingüisticas e culturalas. La federacion dobrís de perspectivas, en tèrmes de ret, de formacion, d'experiéncias, d'emplecs... Enfin, de crear atal una representacion prestigiosa de la lenga e de la cultura occitanas dins las mentalitats. Un jove que parla occitan seriá doncas pus a mème de conéisser una ascension sociala.