logo

                            ​        

Las associacions

Lo Comitat d’Afrairament Occitano-Catalan (CAOC) sèm una entitat culturala sens afan de lucre, registrada amb lo num. 4091 al Registre d’associacions e amb lo NIF  G-08953564.

La nòstra origina s’enclausa sus una iniciativa de Josep Maria Batista i Roca, qui amb la collaboracion d’Enric Garriga Trullols e de Joan Amorós Pla decidiguèron, l’11 de julh de 1977, bastir un novèl afrairament catalano-occitan.

Una Crida Catalano-Occitana se presentèt a Vilanova i la Geltrú, lo 20 de novembre de 1977, dins l’encastre del Congrès de Cultura Catalana, e amb la preséncia significada de l’ancian Director del Burèu de Relacions Meridionalas (Oficina de Relacions Meridionals), Josep Carbonell i Gener, que se li rendèt homenatge. La Crida sortiguèt publicada al jornal Avui lo 22 de novembre de 1997.

Lo Primièr Acamp se debanèt als bastiments Trade de Barcelona, lo 21 de genièr de 1978, e foguèt presidit per Josep M. Batista i Roca.

La Primièra Reunion ensemble de las doas seccions catalana e occitana s’amassèt a l’Universitat de Perpinyà, l’11 de febrièr de 1978.

Los Estatuts del CAOC occitan foguèron presentats a l’Estat francés, segon la Lei de l’1 de julh de 1901, lo 16 de mai de 1978, aTolosa, e signats per Robèrt Lafont, President, e Pèire Lagarda, Secretari. S’i establís que las lengas de l’associacion son l’occitan e lo catalan.

Los Estatuts del CAOC catalan foguèron presentats a l’Estat espanhòl e aprovats lo 19 de junh de 1979 e signats per Joan Amorós Pla, President. S’i establís que l’encastre d’actuacion son totas las tèrras de parla catalana e que las solas lengas de l’associacion son lo catalan e l’occitan.

Lo 23 d’octobre de 1997, lo Diari Oficial de la Generalitat (DOGC) publiquèt l’Acòrdi del Govèrn catalan que declara lo CAOC “Associacion d’interès cultural”.

Tre alara se son debanadas mantunas amassadas de las doas seccions, los Conselhs e los presidents, manifèstes e conferéncias…

Lo CAOC catalan dispausa encara de doas seccions: Amics dels Càtars e Amics d’Arpitània. E mai d’una delegacion a Tolosa de Lengadòc.